677000, Республика Саха (Якутия)
г. Якутск, ул. Курашова, д. 24

8 (4112) 219-331
8 (4112) 219-332

Телефон горячей линии:

Национальнай киин үлэһиттэрин эрэлэ – Кондратий Афанасьев (газета “Саха сирэ”, №133 (6022) от 22.11.2016 г.)

Главная » СМИ о нас » Национальнай киин үлэһиттэрин эрэлэ – Кондратий Афанасьев (газета “Саха сирэ”, №133 (6022) от 22.11.2016 г.)

Кондратий Николаевич Афанасьев  Медицина национальнай киинин курдук улахан  кэлэктиип профсойууһун  бастакы сүһүөх тэрилтэтин 2004 сылтан үһүс болдьоҕор салайар.

 Профсойуус бэрэссэдээтэлэ сарсыарда кэбиниэтигэр киирээт,  үлэһиттэриттэн киирбит сайабылыанньалары, суруктары үөрэтэр. Сыл бүтэн эрэринэн, эһиилги дьылга  уоппускалар графиктарын үлэһиттэрин, отделение салайааччыларын кытары сөбүлэһиннэрэн уонна бигэргэтэн, икки нэдиэлэ иһигэр түмүктүүр соруктаах сылдьар.  Ханнык да кэлэктиипкэ буоларын курдук, киһи бары уоппускатын  сайыҥҥы кэмҥэ ылыан баҕарар. Ону   биир сүбэнэн быһаараллар.

 Кэлэктиип үлэһитэ элбэх (2,5 тыһыынча)   буолан,  уоппуска кэмэ сылы быһа барарын кэриэтэ.

 Аҕыс структурнай подразделение (саамай улахан подразделение 600-чэ киһилээх) үлэһиттэрин  аҥаара – профсоюз чилиэнэ.

Бүгүн, сэтинньи 18 күнэ. Өрөспүүбүлүкэ профсойууһун тэрилтэлэригэр  улахан эппиэтинэстээх күн эбит. Эбиэт кэнниттэн өрөспүүбүлүкэ   профсойуустарын федерациятын  ыччатын сэбиэтин  отчуоттуур-быыбардыыр конференцията буолаары турар. 150-ча делегат иһигэр  Медицина национальнай киинин кэлэктиибиттэн Иннокентий Павлов кыттаары бэлэмнэнэр.

Кондратий Николаевич остуолугар сайабылыанньалара элбэҕин көрөн, дьон саамай ханнык боппуруоһу туруорсарын ыйыталастым. Онуоха: «Урут уруккуттан туруорсар боппуруостара хамнас дьыалата буоллаҕа», – диэтэ. Кини  доруобуйа харыстабылын үлэһиттэрин хамнастарын балаһыанньатын бырайыагын оҥоро сылдьалларын туһунан кэпсээтэ. Ол эбэтэр, ыарахан үлэлээх, күннэтэ элбэх ноҕуруускалаах эмчиттэр хамнас акылаатын улаатыннарарга туруорсаллар. Нуорма быһыытынан, хамнас 70 бырыһыана – акылаат  (мэктиэлэммит чааһа), онтон ордубут  30 бырыһыана  көҕүлүүр хамнас буолуохтааҕа. Оттон билигин, төттөрүтүн, акылаат – 30 эрэ бырыһыаҥҥа, көҕүлүүр хамнас 70-ҥа тэҥнэһэр  курдук буолан тахсар.

Үлэһиттэр олорор дьиэни ыларга урут  уочараттаах  эбит буоллахтарына, билигин ол  сүтэн эрэр. Кондратий Афанасьев ону тэҥэ аутсорсинг өйдөммөт өрүттэрэ, кирэдиит хабалатыгар ылларыы  боппуруостара сытыытык туралларырын бэлиэтиир.

Ол да иһин,  кыһалҕалаах боппуруостары быһаарарга нэдиэлэҕэ биирдэ юрист кэлэн үлэлиир. Онно дьэ, профсойуус чилиэннэрин  туруорсууларын, мунаахсыйыыларын  хайдах быһаарарга, туох бырааптаахтарыгар  сүбэ-ама биэрэллэр, суукка үҥсүү   сайабылыанньатын хайдах суруйарга уо.д.а. көмөлөһөллөр.

Иэдээҥҥэ түбэспит, араас быһыылантан эмсэҕэлээбит, холобур дьиэтэ-уота суох хаалбыт   дьоҥҥо кэлэктиип дуогабарын быһыытынан көмө оҥоһуллар.

Өссө биир сүрүн боппуруоһунан  оҕолору  сынньатыы  буолар.  Урут уонча бөлөххо тиийэ  хомуйан, өрөспүүбүлүкэ таһыгар  оҕо санаторийдарыгар, лааҕырдарыгар сынньата ыыталлара. Бөлөхтөрү сүрүннээн  бэйэлэрин үлэһиттэрэ уонна эмчит идэлээх төрөппүттэр салайан илдьэллэрэ. Билигин ол кыаллыбат буолла.

Кондратий Николаевич  бу күннэргэ быһаарыахтаах боппуруостара өссө да элбэх. Холобур, сэтинньи 24 күнүгэр  Арассыыйа ийэлэрин күнүгэр аналлаах тэрээһини,  дьиэ кэргэнинэн кэнсиэри  ыытарга бэлэмнэнии үлэтин сүрүннүүр. Оҕолор уруһуйдарын куонкуруһугар киирбит үлэлэри  биир биир көрдөрдө. Сэтинньи 24 күнүгэр диэри куонкурус түмүгэ быһаарыллыахтаах. Эмчиттэр кэлэктииптэрэ ыытар тэрээһиннэригэр профсойуус  тэрилтэтэ техническэй уонна үп-харчы өттүнэн тиһигин быспакка көмөлөһөр.

Ол быыһыгар тустаах докумуоннарга  илии баттата, сүбэлэтэ  профсойуус үлэһитэ сотору-сотору  киирэр. Атын да боппуруостары интэриэһиргээн, төлөпүөн оргуйан олорор.

Медицина Национальнай киинин  профсойууһун салайааччытын күннээҕи түбүгэ бу күннэргэ хаһааҥҥытааҕар да үксээтэ. Ол курдук, Саха сиригэр профсойуустар хамсааһыннара  95 сылыгар уонна  Саха Өрөспүүбүлүкэтигэр  Профсоюз үлэһитин күнүгэр аналлаах тэрээһиннэргэ бэлэмнэнэллэр.

Надежда ЕГОРОВА.

Календарь профсоюзных событий